ВМРО-ДПМНЕ и СДСМ денеска разменија остри политички обвинувања, при што владејачката партија го обвини лидерот на СДСМ, Венко Филипче, дека молчи за, како што наведуваат, дипломатскиот скандал со Бугарија, додека опозициската партија возврати со тврдења дека во Владата владеат несогласувања и борба за позиции.
Од ВМРО-ДПМНЕ реагираат по објавувањето на доверлива дипломатска комуникација од страна на бугарското Министерство за надворешни работи, оценувајќи дека станува збор за сериозен дипломатски преседан и удар врз државните интереси.
Според партијата, без разлика на објаснувањата од Софија дека документите се од поодамнешен период, останува прашањето како доверлив дипломатски документ со чувствителни информации станал јавно достапен. Од ВМРО-ДПМНЕ тврдат дека Филипче не реагирал на случајот и го обвинуваат дека избегнува критика кон официјална Бугарија.
„Овој случај уште еднаш покажа кој е подготвен да ја брани Македонија, а кој е подготвен да молчи кога државата е нападната. Македонија нема да се повлекува и нема да прифаќа понижувања. Националните интереси не се предмет на пазарење“, велат од ВМРО-ДПМНЕ.
Од друга страна, СДСМ обвинува дека во владејачката коалиција постојат сериозни несогласувања и дека, наместо да се решаваат проблемите на граѓаните, се води борба за министерски функции и влијание.
Од партијата тврдат дека коалицијата предводена од премиерот Христијан Мицкоски се соочува со внатрешни поделби, при што изнесуваат обвинувања и за несогласувања меѓу претставници на коалициските партнери околу распределбата на ресорите.
СДСМ, исто така, оценува дека Владата се соочува со финансиски проблеми и тврди дека премиерот бара начин да распише предвремени парламентарни избори.
„Ова не е борба за подобра Влада. Ова е борба за опстанок на криминална структура која се распаѓа. Време е за вистина и правда. Време е граѓаните да ја вратат власта во свои раце“, се наведува во соопштението на СДСМ.
Со денешните соопштенија продолжува размената на меѓусебни политички обвинувања меѓу власта и опозицијата околу актуелните политички случувања во земјата.