Недостиг на вода или злоупотреба? Ова е прашањето за кое најмногу се дискутира во Тетово во овој период, додека продолжуваат високите температури, а дел од иселениците сè уште се на одмор.
Во текот на денот, на терен беа забележани граѓани кои со вода за пиење ги мијат улиците и тротоарите, а ги наводнуваат и зелените површини во дворовите.
Анкетираните граѓани велат дека снабдувањето зависи од населбата во која живеат. Тие признаваат дека има големи злоупотреби и бараат интервенција од институциите и општинскиот инспекторат.
„Зависи каде се наоѓаш, зависи од населбата. Секој ден гледаме како ги мијат дворовите, тротоарите и ги наводнуваат градините“.
„Таму каде што живеам јас, да, има многу луѓе кои ја злоупотребуваат водата. Нормално дека треба да се преземат мерки. Особено во долниот дел на Тетово, водата се користи за работи за кои не треба – за градини. Мислам дека општината треба да дејствува“.
„Има случаи каде што јасно се гледа дека ја злоупотребуваат водата за пиење за наводнување, наместо да користат индустриска вода. И оние што ги мијат автомобилите, не знам со каква вода се снабдуваат. Во оваа жештина и криза со вода, би било добро да имаме малку повеќе штедење и разумност, особено за оние кои живеат во високи згради каде што има повеќе проблеми“.
Од Јавното комунално претпријатие „Шари“ потврдуваат дека има поплаки за пад на притисокот или недостиг на вода, но нагласуваат дека актуелните капацитети се повеќе од доволни. Градот моментално се снабдува со 450 литри вода во секунда, од 300 литри колку што се реалните потреби на Тетово.
„Во моментов имаме стабилна состојба. Во споредба со минатата година или пред две години, годинава имаме подобро снабдување. Сепак, повторно наидуваме на населени места каде што се губи притисокот и граѓаните се жалат. Сето ова е како последица на големите злоупотреби во текот на денот поради високите температури. Им упатувам апел на сите оние кои наводнуваат или ги мијат улиците да ги прекинат овие дејствија, во спротивно ќе излеземе на терен со инспекторатот за да ги казниме. На Тетово му се потребни 300 литри вода во секунда, а ние со 450 литри повторно имаме поплаки. Сега се поставува прашањето: колку литри вода навистина му се потребни на овој град?“, вели Валон Зеќири.
Во Тетово, фактурирањето на водата се врши по глава на жител. Ова прави долните делови на градот да имаат прекумерно снабдување и повисок притисок, додека слаб на притисок се забележува во населбите во подножјето на Шар Планина, каде што потрошувачката значително се зголемува со доаѓањето на иселениците и зголемувањето на температурите.