Последните лабораториски анализи потврдуваат дека водата од градскиот водовод во Скопје е безбедна за употреба и ги исполнува сите пропишани стандарди за квалитет, соопштија од ЈП „Водовод и канализација“ – Скопје.
Според информациите од Секторот за санитарна контрола, испитувањата спроведени во текот на изминатата недела не покажале никакви отстапувања, а сите анализирани физичко-хемиски и микробиолошки параметри се во рамките на законски дозволените вредности.
Во периодот од 20 до 24 јули, стручните служби земале примероци од повеќе локации низ главниот град со цел да се изврши редовен мониторинг на квалитетот на водата.
„Секторот за санитарна контрола во периодот од 20 до 24 јули зема 195 примероци за физичко-хемиска и 195 примероци за микробиолошка анализа на вода за пиење од 45 мерни места во Градот Скопје“, информираа од ЈП „Водовод и канализација“ – Скопје.
Од претпријатието посочуваат дека неделните извештаи за квалитетот на водата редовно се објавуваат со цел граѓаните да бидат навремено информирани и да имаат увид во резултатите од анализите.
Контролите ќе продолжат и во наредниот период како дел од редовниот систем за следење на исправноста и безбедноста на водата за пиење во главниот град.