Камбоџански покраински функционер изјави дека рано утрово вооружените судири меѓу Тајланд и Камбоџа продолжиле во најмалку шест области долж границата, ескалирајќи ги тензиите што траеја со месеци.
Првиот судир се случил во четврток наутро во област во близина на древниот храм Та Муен Том, по должината на границата меѓу тајландската покраина Сурин и камбоџанската покраина Одар Минчи.
Борбите вклучувале размена на оган, гранатирање и ракетирање, во кои, според тајландската страна, загинале 14 лица, а ранети биле 14 војници и 32 цивили. Тајланд одговорил со воздушни напади.
Ова беше втор вооружен конфликт откако во мај беше убиен камбоџански војник, а новата голема ескалација се случи неколку часа откако двете земји ги ограничија дипломатските односи по експлозија на мина во која беа повредени тајландски војници.
Иако земјите подоцна изјавија дека се согласиле да ја деескалираат ситуацијата, камбоџанските и тајландските власти продолжија да спроведуваат или да се закануваат со мерки, одржувајќи ги тензиите високи.
Тајланд воведе строги гранични ограничувања со Камбоџа, запирајќи ги речиси сите премини освен за студенти, медицински пациенти и други со основни потреби. Во четврток, тајландските власти објавија дека целосно ја затвораат границата.
Камбоџа ги забрани тајландските филмови и ТВ-емисии, го суспендираше увозот на тајландско гориво, овошје и зеленчук и ги бојкотираше некои од меѓународните интернет-врски и снабдувањето со електрична енергија на својот сосед.
Тајланд и Камбоџа делат повеќе од 800 километри копнена граница, а граничните спорови се долгогодишни проблеми што предизвикуваат периодични тензии меѓу двата соседа.
Спорните тврдења главно произлегуваат од карта од 1907 година нацртана под француска колонијална власт, која била искористена за одвојување на Камбоџа од Тајланд. Камбоџа ја користела картата како референца за да ја побара територијата, додека Тајланд тврдела дека картата е неточна.
Најважните и насилни судири се случиле околу 1000-годишниот храм Преах Вихер.
Во 1962 година, Меѓународниот суд на правдата ѝ доделил суверенитет над областа на храмот на Камбоџа. Пресудата станала голем спор во билатералните односи.
Камбоџа повторно се обрати до судот во 2011 година, по неколку судири меѓу нејзината армија и тајландските сили во кои загинале околу 20 лица, а илјадници биле раселени. Судот ја потврди пресудата во корист на Камбоџа во 2013 година.