Трета недела по ред вработените во Култура протестираат за повисоки плати. Барањето на Синдикатот на вработени во Министерството за култура, Администрација и заштита на културното наследство и Агенцијата за филм, е да им се покачат платите за 30% по покачувањето на платите на вработените во Министерството за финансии.
Претседателот на Синдикатот на УПОЗ во рамки на Министерството за култура, Бранко Костовски, повтори дека нивното единствено барање е да имаат достоинствена плата, а најави дека нема да застанат и дека ќе преземат порадикални чекори.
Поминаа речиси две недели откако вработените во Здравство добија ветување за покачување на платите за 2 и 3 илјади денари, но во тој правец се уште нема никакво поместување. Љубиша Каранфиловски, претседател на Независниот синдикат на Здравство рече дека чекаат зелено светло од Министерството за финансии.
Изгледа функционерите сепак ќе добијат покачување од 78% на платите. За одлуката на Уставен Суд можете да се обратите само во суд, рече Премиерот Димитар Ковачевски, а што се однесува до Владата, ние работиме за составување на закон за платите на вработените, кои, како што рече не вршат државна функција.
Уставниот Суд овозможи покачување на платите на функционерите, при што беа избришани два члена на Законот за плати и додатоци за службеници, така да тоа важи за функционерите, заменик министрите, градоначалниците, директорите и сите судии, вклучувајќи го и уставните судии за 78%.