Српскиот премиер Милош Вучевиќ денеска изјави дека е прашање на денови кога неговата оставка ќе биде констатирана во Народното собрание и истакна дека тоа е „незапирлив процес“ и дека работите се јасни правно и политички и дека не е опција тој повторно да биде мандатар за формирање нова влада.
Вучевиќ, коментирајќи ги наводите во некои медиуми за неговата оставка, рече дека за тоа нема шега и дека е доволно сериозен и одговорен човек и дека на 29 јануари се појавил пред српската јавност и најавил дека поднесува неотповиклива оставка.
„Овој процес е незапирлив. И после тоа, додека не се донесе одлука дали ќе добиеме нова влада или ќе има избори, јас ќе ја водам владата во технички мандат. Овде работите се многу јасни, правно и политички“, изјави Вучевиќ.
Тој изјави дека одлуката за одржување на седница на Националното собрание на која ќе биде констатирана неговата оставка ја носи претседателот на Собранието во договор со шефовите на пратеничките групи и дека за оставката нема да се одлучува на таа седница, туку само да се констатира.
Тој додаде дека очекува седницата на Собранието да се одржи многу брзо, наведувајќи дека тоа е процес кој истовремено вклучува политички консултации и дискусии за да се одржи седницата.
Тој објасни дека кога Националното собрание ќе ја потврди оставката, почнува да тече рок од 30 дена за избор на нова влада или за одржување избори, а периодот до закажување и одржување на седницата се користи за дискусии меѓу партнерите и политичките актери.
Вучевиќ рече дека не може да се игнорираат општествено-политичките околности, протестите и неуспешните обиди за дијалог за исполнување на барањата на студентите.