Во текот на оваа недела ќе започне доделувањето на првите картички за зелена нафта, најави министерот за земјоделство, шумарство и водостопанство Борче Серафимовски. Тој истакна дека ваквата мерка следува кога земјоделците повторно влегуваат во нивите за есенските работи.
-Во пресрет на есенската обработка и подготовката на нивните во текот на оваа недела започнуваме со доделување на првите картички за зелена нафта. За оваа мерка, обезбедивме 584 милиони денари . Поддршката ја зголемивме за 12,3 проценти, со што директно го намалуваме трошокот за гориво во период кога земјоделците повторно влегуваат во нивите, изјави Борче Серафимовски, министер за земјоделство.
Директорот на Државниот инспекторат за земјоделство Ивица Ангеловски говореше и за резултатите од контролите на откупот на различни производи. Тој рече дека досега се извршени 873 инспекциски надзори кај лица кои вршеле откуп на земјоделски производи.
-Во текот на 2026 година државните инспектори за земјоделство за утврдените неправилности имаат изречено вкупно 30 инспекциски мерки за кои се издадени решенија во форма на забрани, опомени, наредби и задолженија. Дополнително за утврдени неправилности при откупот државните инспектори за земјоделство имаат издадено и 17 платни налози од кои 3 се платени а за останатите кои не се платени се води прекршочна постапка, изјави Ивица Ангеловски, директор на Државен инспекторат за земјоделство.
На денешната прес конференција беше информирано и дека е донесен Правилникот за млечните производи со кои употребата на млеко во прав и палмино масло во млечните производи е ограничено на 1 до максимум 2 проценти. Истовремено се предвидува и кредитна линија од околу 800 милиони денари за поддршка на винариите и на преработувачите на ориз.