Единаесет морнари се водат како исчезнати откако товарен брод потона по напад со дронови во близина на бугарскиот брег на Црното Море. Во истиот период бил нападнат и уште еден брод, чиј екипаж бил спасен, соопштија бугарските власти.
По инцидентите, Бугарија ја повика руската амбасадорка на разговор. Софија не ја обвини директно Москва за нападите, но бугарскиот премиер Румен Радев изјави дека нивниот исход „ѝ оди во прилог на Руската Федерација“.
Од потонатиот брод се спасени петмина морнари, додека 11 се водат како исчезнати. Претседателката на Бугарија, Илијана Јотова, соопшти дека станува збор за товарниот брод „ХС Дигнити“ (HS Dignity), кој пловел под знамето на Гвинеја-Бисао. Потрагата по исчезнатите членови на екипажот продолжува во близина на селото Крапец.
Вториот брод, „Челси 3“ (Chelsea 3), кој пловел под малтешко знаме, бил погоден од три дрона во текот на ноќта. Сите 15 членови на екипажот, од кои седуммина биле украински, а осуммина азербејџански државјани, биле спасени. Според бугарските власти, никој од нив не бил сериозно повреден.
„Ова е апсолутно неприфатливо – уште еден напад во непосредна близина на бугарските територијални води“, изјави Радев во телевизиско обраќање.
Од Москва засега нема непосредна реакција за инцидентите.
Нападите ги осудија и Украина и Европската Унија. Претседателката на Европската комисија, Урсула фон дер Лајен, оцени дека Црното Море станува нов фронт на ескалација на руската војна во Украина и порача дека одговорните треба да сносат последици.
Украинскиот министер за надворешни работи, Андриј Сибиха, изјави дека нападот повторно го покажува, како што наведе, намерното непочитување на цивилните животи од страна на Москва. Тој предупреди дека Црното Море е од суштинско значење за глобалната безбедност на снабдувањето со храна.
По телефонските разговори со фон дер Лајен и генералниот секретар на НАТО, Марк Руте, Радев побарал поддршка за зајакнување на бугарскиот надзор над поморскиот простор и воздушниот сообраќај. Руте изјавил дека НАТО ќе продолжи да го приспособува своето воено присуство на источното крило според потребите.
Инцидентот се случува само една недела по потонувањето на друг брод во ексклузивната економска зона на Бугарија во Црното Море, исто така по напад со дронови. Во тој случај, во морето исчезнале девет сириски и еден египетски морнар, додека екипажот на уште еден погоден брод бил спасен.
По средбата со Радев во Софија, руската амбасадорка Елеонора Митрофанова изјавила дека нема информации од руското Министерство за одбрана за напади врз комерцијални бродови во Црното Море. Таа не ја исклучила можноста да станува збор за провокација од трета страна, соопшти бугарската влада.
Поморскиот сообраќај во Црното Море сè повеќе е вовлечен во војната меѓу Русија и Украина, која започна со руската целосна инвазија во 2022 година. Двете земји се меѓу најголемите светски извозници на жито. Русија ги напаѓа украинските пристаништа на Црното Море, поради што Украина сè повеќе се потпира на дунавските пристаништа и поморските рути во близина на бреговите на земјите членки на НАТО, Бугарија и Романија.
Украина, пак, сè почесто цели кон руски бродови што превезуваат жито во други делови на Црното Море и во Азовското Море, во близина на устието на реката Дон.