За четиричлено домаќинство се потребни минимум 60.000 денари за да го преживее месецот. Ова го изјави заменик министерот за финансии Николче Јанкуловски во емисијата Бизнис 21 која се емитува вечерва, но како свој личен став. Тоа е приближно сумата која ја пресметува и Сојузот на синдикатите на Македонија во синдикалната минимална кошничка. Јанкуловски лично смета и дека минималната плата која сега изнесува 24.400 денари не е доволна.
Новинар: Добро вие колку трошите месечно, да речеме месечно колку ви се потребни
„За четиричлено семејство околу 60.000 денари“.
Новинар: Дали 24.400 ваш личен став се доволна минимална плата
Јанкуловски: Мој личен став е дека не се доволни, но тоа е мој личен став. Тука се од една страна и работодавачите кои што треба да ги исплаќаат финансиските средства, од друга страна се и синдикатите
Јанкуловски не се согласува ни дека одморот е луксуз и лично смета дека, барем одмор во Дојран, треба да влезе при пресметката на владината просечна потрошувачка кошничка.
Новинар: Сметате дека одморот на граѓаните е луксуз, макар и Дојран.
„ Значи секој работник заслужува одмор. Ете го споменавте Дојран, може ете определена сума да влезе и во потрошувачката кошничка. Но ова од аспект на Николче Јанкуловски, не како став на министерство за финансии“, вели Николче Јанкуловски.
Иако и министерството за финанси е вклучено во изработката на владината кошничка, која е готова и веќе требаше веќе да биде објавена,сепак Јанкуловски не открива детали колку изнесува и што содржи.
Дека летување во странство за Владата е луксуз и дефинитивно ќе го нема во пресметките во владината просечна потрошувачка кошничка неодамна најави заменик-министерот за економија, Ристески. Но, не одговори прецизно дали ќе се пресметува барем трошокот за седумдневен одмор во Дојран, кој го има во минималната кошничка на Синдикатот.
Измени во кошничката пак побара лично премиерот Мицкоски зошто во кошничката на Синдикатот имало чудни производи. Министерството за економија и неколку државни институции ја изработија кошничката. Беше најавено дека ќе биде објавена до крај на април, се уште ја нема. А и никој не открива детали колку изнесува и што содржи. Она што се знае е дека наместо за четиричлено, ќе биде за тричлено семејство.