Полициската акција заврши со апсење на осум лица, меѓу кои поранешни директори на Фондот за здравствено осигурување и службени лица од приватната болница „Санте Плус“. При претресите на десет локации во три града биле запленети и материјални докази, меѓу кои 50 илјади евра во готово и мобилни телефони. Од МВР велат дека е разбиена организирана криминална група, чии членови, според сомнежите, им наплаќале на пациентите приватно за операции на очите, иако услугите биле покриени од Фондот.
„Врз основа на договор, преку внесување невистинити податоци во електронскиот систем на Фондот за здравствено осигурување и изготвување фактури со лажна содржина, постои сомнеж дека наведената болница намерно ги фактурирала истите услуги и од Фондот за здравствено осигурување и од пациентите. И покрај законското учество во трошоците, пациентите биле принудени дополнително приватно да ја платат цената на операциите, при што биле прикривани услугите што веќе биле платени и од самиот Фонд.“, велат од МВР.
Акцијата, предводена од Обвинителството за гонење на организираниот криминал и корупцијата, започнала во средата наутро. Според неофицијални информации, меѓу лицата опфатени со истрагата е и поранешниот директор на Фондот за здравствено осигурување, Ден Дончев, кој се споменува како првопријавен во овој случај.
Неофицијалните информации ги споменуваат и Ридван Асани, поранешен претседател на Управниот одбор на ФЗО, Весна Ќамилова, поранешна менаџерка на болницата „Санте“, како и Салих Бозкурт, поранешен сопственик и овластено лице во болницата. Меѓу споменатите се и Цветен Серафимовски, поранешен директор на Одделението за контрола во ФЗО; Жаклина Стаменкова, поранешна директорка на подрачната единица на ФЗО во Скопје; и Ирена Поповска, актуелна раководителка на подрачната единица во Скопје.
„Обвинителството за гонење на организираниот криминал и корупцијата, заедно со полицијата, спроведе акција на десет локации во Скопје, Тетово и Куманово, во врска со финансиски злоупотреби на Фондот за здравствено осигурување и приватна болница. Првичните информации покажуваат дека штетата во буџетот на Фондот изнесува околу 1,5 милиони евра, додека незаконската добивка на приватната болница се проценува на околу четири милиони евра.“, вели репортерот на ТВ21.
Според надлежните институции, осомничените се товарат за повеќе кривични дела, меѓу кои злоупотреба на службената положба и овластување, несовесно работење во службата, измама и перење пари. Се сомнева дека се оштетени и голем број пациенти кои биле лекувани во оваа болница.