Алијансата за Албанците реагираше во врска со резултатите од приемот на ученици во Средното полициско училиште „7 Мај“, изразувајќи загриженост за застапеноста на Албанците. Според партијата, од вкупно 310 примени ученици, само 9 се Албанци, што претставува помалку од 3 отсто. АА истакнува и дека наставата во ова училиште се одвива само на македонски јазик.
„Станува збор за училиште кое ги подготвува идните кадри во полицијата и каде на дипломираните ученици им се гарантира вработување во Министерството за внатрешни работи. Тоа значи дека денешниот состав на ова училиште директно ќе се одрази врз составот на полицијата во наредните години. Дополнително, наставата се одвива само на македонски јазик. Бараме целосна транспарентност на конкурсот, бројот на албански кандидати кои аплицирале, начинот на оценување и причините што довеле до ваков скандалозен резултат“, се наведува во реакцијата на Алијансата за Албанците.
Од друга страна, заменик-министерот за внатрешни работи, Астрит Исени, реагираше на критиките на опозицијата во врска со застапеноста на Албанците во Средното полициско училиште. Исени не открива колку албански кандидати имало на конкурсот, но вели дека бројот на заинтересирани албански кандидати бил многу низок.
„Прашањето на застапеноста на Албанците во безбедносните институции е одговорност што ја сфаќаме сериозно. Поради тоа, секој процес што влијае врз застапеноста на Албанците треба да се третира со транспарентност, одговорност и врз основа на факти, а не да се користи за политички цели. По 26 години, Полициската академија повторно се враќа. Од самиот почеток постојано повикувавме што повеќе млади Албанци да аплицираат и да ја искористат оваа можност. Но денес треба да зборуваме со факти, а не со пропаганда. Интересот на Албанците за овој конкурс не беше ниту приближно до нашите очекувања. Дури и од оние кои аплицирале, одреден број не се појавиле на фазата на тестирање, со што фактички се повлекле од натпреварот. Затоа, политички е нечесно да се тврди дека Албанците биле „исклучени“, без да се каже колкумина аплицирале, колку го продолжиле процесот и колку ги исполниле утврдените критериуми. Нема да дозволиме еден институционален процес да се искористи за создавање чувство на исклученост кај албанскиот граѓанин. Се бориме за реална застапеност, еднакви можности и фер пристап до секоја институција. На ДУИ ѝ порачувам: Не го користете интересот на Албанците за дневна политика“, напиша Исени.