Премиерот Димитар Ковачевски и претседателот на Алијанса за Албанците, Арбен Таравари, утре ќе имаат средба каде ќе се разговара за евентуалниот влез на АА во Влада.
Лидерот на АА, Арбен Таравари, извести дека за утре подготвиле програма со 5 точки каде се опфатени нивните барања за влез во Влада. Иако не сакаше да зборува конкретно за што се 5-те точки, Таравари рече дека гаранција за уставните измени ќе биде една од нивните барања.
„Ние ги изготвивме нашите барања кои главно се програмски, сме поднеле неколку барања и за кадровски решенија, но главно нашите барања се програмски и ќе видиме дали тие се прифатливи за премиерот и мнозинството“, истакна Арбен Таравари.
Доколку 5-те барања на АА се прифатливи за парламентарното мнозинство, тогаш ќе се разговара за поделба на ресорите, а доколку не, Таравари рече дека оваа тема наскоро треба да се затвори и тие ќе продолжат да бидат дел од опозицијата.
И премиерот, Димитар Ковачевски, рече дека очекува утре со Таравари да разговараат за законски и програмски решенија.
Во преговарачкиот тим на АА, освен Таравари се очекува да бидат и Зијадин Села, Кренар Лога, Исен Шабани, Илире Даути, Бујаре Абази и Елми Азири. Неофицијално се дознава дека АА се очекува да го добие Министерството за здравство, Правда и треба да бира меѓу МОН и Екологија, две ресори раководени од кадар на ДУИ.