Претседателот на Соединетите Американски Држави, Доналд Трамп, зборуваше за разговорите што ги имал со израелскиот премиер Бенјамин Нетанјаху во неделата навечер, во време кога Израел изврши ракетни напади врз Иран.
Во кратко телефонско интервју за Би-Би-Си, Трамп беше прашан дали Нетанјаху дејствувал против неговите желби со наредбата за напад врз Иран. Американскиот претседател го негираше ова, нагласувајќи дека ракетите веќе биле лансирани до моментот кога разговарал со израелскиот лидер.
„Ракетите веќе беа на пат“, изјави Трамп, додавајќи дека Нетанјаху не го игнорирал неговиот став.
„Не, не. Тоа не се случи. Ракетите веќе беа испукани, тие беа во лет“, рече тој.
Тој додаде: Ако му кажам да направи нешто, тој го прави тоа.
Трамп, исто така, изјави дека за време на комуникацијата со израелскиот премиер побарал да преовлада разумот и да се избегне понатамошна ескалација на ситуацијата.
„Единственото нешто што му го кажав беше дека логиката мора да преовлада. Блиску сме до потпишување на многу важен договор, многу добар договор“, се цитира изјавата на американскиот претседател.
Во меѓувреме, меѓународните медиуми открија нови детали за честите контакти меѓу Трамп и Нетанјаху, во време кога тензиите меѓу Израел и Иран повторно се зголемија, по прекинот на огнот што беше воспоставен на почетокот на април.
Изјавите на Трамп доаѓаат во деликатен момент за регионот, бидејќи меѓународната заедница со загриженост ги следи случувањата меѓу двете земји и ризикот од понатамошна ескалација на конфликтот.