Поранешниот тренер на Реал Мадрид, Карло Анчелоти, јавно ја поддржа можноста Жозе Мурињо повторно да седне на клупата на „кралскиот клуб“, оценувајќи дека португалскиот стратег има капацитет повторно да го врати тимот на победничките патеки.
Во интервју за „The Athletic“, Анчелоти изјави дека би бил среќен доколку Мурињо се врати во Мадрид.
„Ќе бидам навистина среќен ако се врати во Реал Мадрид. Тој може да заврши фантастична работа, како што правеше во сите клубови каде што работеше“, изјави италијанскиот тренер.
Реал Мадрид се наоѓа во турбулентен период по неуспешната сезона и серијата лоши резултати. Иако Чаби Алонсо беше гледан како лидер на новиот проект, слабите настапи и проблемите во соблекувалната доведоа до негово заминување. Ниту Алваро Арбелоа не успеа да ја стабилизира екипата, по што раководството на клубот наводно повторно се свртело кон Мурињо.
Португалецот веќе го водеше Реал Мадрид од 2010 до 2013 година, период во кој тимот успеа да биде сериозен ривал на доминантната Барселона на Пеп Гвардиола. Претседателот Флорентино Перез, според шпанските медиуми, верува дека токму Мурињо може повторно да изгради конкурентен тим.
Сепак, не сите легенди на клубот се согласуваат со ваквата идеја. Поранешниот капитен Икер Касиљас јавно изрази сомнеж околу евентуалното враќање на Мурињо, оценувајќи дека отказот на Чаби Алонсо бил погрешен потег.
Иако во последните години Мурињо често беше критикуван за резултатите и стилот на игра во клубовите што ги водеше, неговото тренерско резиме останува импресивно. Тој има освоено титули во Премиер лигата, Ла Лига и Лигата на шампионите, а неговото искуство се смета за клучен фактор во обидот Реал повторно да стане европска сила.
Еден од најголемите предизвици за евентуалниот нов тренер ќе биде вклопувањето на Килијан Мбапе и Винисиус Жуниор во ист систем. Двајцата офанзивци преферираат игра по левата страна, што создава тактички проблеми и недостиг на рамнотежа во нападот.
Додека Џуд Белингем и Винисиус веќе изградија добра соработка на теренот, интеграцијата на Мбапе досега не донесе посакуван ефект. Според анализите, Мурињо би требало да најде начин да ги приспособи улогите на француската и бразилската ѕвезда за да го извлече максимумот од нивниот потенцијал.
Според најавите, Реал Мадрид би можел официјално да го објави враќањето на Мурињо по завршувањето на сезоната 2025/26. Португалецот наводно побарал тоа да се случи по последниот натпревар на Бенфика, каде што моментално работи, со цел мирно да го заврши својот ангажман.