Австралискиот министер за надворешни работи Пени Вонг денес ја повика Русија да плати отштета за соборувањето на авионот на „Малезија ерлајнс“ на летот MH17 во 2014 година, откако Европскиот суд за човекови права (ЕСЧП) ја прогласи Москва за одговорна за трагедијата.
Судот во Стразбур вчера утврди дека Русија не ја потврдила целта на ракетата со која беше соборен авионот на „Малезија ерлајнс“ со 298 лица над украинскиот регион Донецк на 17 јули 2014 година.
ЕСЧП, исто така, соопшти дека Москва не ги заштитила животите на лицата во Боингот 777, кој летал од Амстердам до Куала Лумпур кога бил погоден од противвоздушна ракета испукана од проруските бунтовници.
Сите 298 лица во авионот загинаа, вклучувајќи 196 холандски државјани, 38 Австралијанци и четворица Германци. Русија негира одговорност за инцидентот.
„Ја поздравуваме пресудата на Европскиот суд за човекови права дека Русија е одговорна за соборувањето на летот MH17“, рече Вонг во објава на „Икс“, нарекувајќи го „историски момент за 298-те жртви и нивните најблиски“.
„Оваа пресуда следи по одлуката на Советот на ICAO во мај дека Русија е одговорна и мора да преговара со Австралија и Холандија за целосна компензација“, рече Вонг и додаде:
„Уште еднаш ја повикуваме Русија да се соочи со својата одговорност и да плати отштета за овој ужасен чин.“