Белата куќа соопшти дека за Босна и Херцеговина е номиниран Роналд Џонсон од сојузната држава Масачусетс за функцијата вонреден и ополномоштен амбасадор на САД. Џонсон е пензиониран бригаден генерал од Корпусот на маринците на САД. За Србија е номиниран Мајкл Јанг од државата Ута.
За Црна Гора е номиниран Питер Мекој од Јужна Каролина. Мекој во текот на својата правна кариера служел како државен обвинител за округот Јужна Каролина од 2020 до 2021 година, а претходно работел како кривичен обвинител.
Претходно, САД го номинираа и својот амбасадор за Албанија.
Во меѓувреме, во однос на Косово, Вашингтон сè уште нема официјално соопштение, додека Амбасадата на САД во Приштина во моментов ја предводи вршител на должност, Ану Пратипати, по завршувањето на мандатот на претходниот амбасадор Џефри Ховениер кон крајот на декември 2024 година.
Според денешното соопштение, САД номинирале амбасадори и за Ел Салвадор, Азербејџан, Камбоџа, Екваторска Гвинеја, Молдавија, Индонезија, Бугарија, Тринидад и Тобаго, Парагвај, Колумбија, Литванија, Египет, Бразил, Еквадор, Гамбија, Сиера Леоне и Кенија.
Процедурата за номинирање амбасадори на САД се заснова на уставниот принцип на „совет и согласност“ на Сенатот.
Претседателот најпрво го номинира кандидатот за амбасадор, кој може да биде дипломат од кариера или политички назначено лице. Потоа номинацијата се испраќа до Комитетот за надворешни работи на Сенатот, кој ја разгледува.
Само откако Сенатот ќе го потврди кандидатот со мнозинство гласови, претседателот на САД официјално го назначува амбасадорот.
Новиот амбасадор потоа заминува во земјата домаќин и ги предава акредитивните писма на шефот на државата, со што и официјално ја презема функцијата.