Основното јавно обвинителство Тетово поведе постапка против 50-годишен маж поради сомнение дека сторил кривични дела „Загрозување на сигурноста“ и „Неизвршување судска одлука“, во случај поврзан со семејно насилство.
Според Обвинителството, инцидентот се случил на 14 август, кога осомничениот наводно сериозно ѝ се заканувал на сопругата и ќерката, предизвикувајќи кај нив чувство на страв и загрозеност.
Случајот добил дополнителна драматична димензија кога во семејниот дом дошле лица кои од 50-годишникот побарале да им бидат вратени 200 евра, пари кои, според нивните тврдења, му ги дале за наводно лекување и дијализа на девојчето.
Во тој момент, сопругата на осомничениот наводно признала дека тој ги измамил и најавила дека ќе повика полиција. Тогаш, според пријавеното, ситуацијата ескалирала.
Осомничениот започнал да го удира девојчето и истовремено да им се заканува на сопругата и ќерката дека ќе ги запали доколку полицијата го приведе.
Од Обвинителството велат дека со ваквото однесување осомничениот предизвикал чувство на сериозен страв и загрозеност кај оштетените.
Особено отежнувачка околност е тоа што, според обвинителството, тој ги прекршил и претходно изречените мерки за заштита од семејно насилство, определени од Основниот суд во Тетово.
Поради сите околности на случајот, надлежниот јавен обвинител до судијата на претходна постапка доставил предлог за определување мерка притвор за осомничениот.
Одлуката за евентуалното определување притвор е во надлежност на судот.