ДУИ реагира на изјавата на Мицкоски: Нѐ враќаат во 2008, кога албанскиот јазик се користеше само со посебни формулари

Вчерашната изјава на премиерот за употребата на албанскиот јазик, според ДУИ, јасно ја открива намерата на Христијан Мицкоски да го деградира официјалниот статус на албанскиот јазик, претворајќи го, како што велат, во застарена и неприфатлива формула, како во законот од 2008 година, каде албанскиот се користел само по барање на Албанците и со пополнување на посебни формулари.

„Ова е отворен обид за укинување на албанскиот јазик загарантиран со Уставот и со Законот за употреба на јазиците од 2018 година, кој го постави албанскиот јазик како службен во сите централни институции. Сега е јасно дека владата не ја признава оваа реалност и се подготвува да го укине овој закон преку Уставниот суд.“, рече Амир Шабани од ДУИ.

Ваквата реакција на ДУИ доаѓа по еден ден откако премиерот Мицкоски, одговарајќи на прашањето за Законот за правата на децата за кој имаше обвинувања дека се скратува правото на двојазични лиценци, увери дека Албанците ќе можат да го побараат формуларот на албански јазик.

Мицкоски тврди дека Законот ќе го разгледа Владата и ќе го испрати во Собранието, но и покрај неговата изјава дека албанскиот јазик ќе се почитува, од ДУИ истакнаа дека ќе ги искористат сите политички, правни и демократски средства за да се спротивстават на оваа, како што велат, ретрогресија и да ги заштитат тешко стекнати права. ДУИ ги повикаа Албанците да бидат свесни за ризикот кој им се заканува на Албанците и обединети да застанат против овој обид за намалување на политичкиот и правниот статус на Албанците.