Дванаесет држави во средата поднесоа тужба против администрацијата на претседателот Доналд Трамп во американскиот суд за меѓународна трговија во Њујорк, барајќи да ја блокираат неговата тарифна политика, за која велат дека се нелегални и штетни за американската економија.
Во тужбата се наведува дека политиките на Трамп се резултат на неговата „каприциозност, а не легитимно практикување на власта“ и го оспорува тврдењето на претседателот дека може произволно да воведува тарифи според Меѓународниот акт за економски овластувања за вонредни состојби (IEEPA). Тужителите бараат од судот да ги прогласи тарифите за незаконски и да и наложи на федералната влада и нејзините службеници да престанат да ги спроведуваат.
Меѓу државите кои ја потпишаа тужбата се Орегон, Аризона, Колорадо, Конектикат, Делавер, Илиноис, Мејн, Минесота, Невада, Њу Мексико, Њујорк и Вермонт.
Во соопштението за печатот, јавниот обвинител на Аризона, Крис Мејс, ги нарече тарифните политики на Трамп „лудост“, додавајќи дека тие се „економски неодговорни и незаконски“.
Јавниот обвинител на Конектикат Вилијам Тонг рече: „Незаконските и хаотични тарифи на Трамп се огромен данок за семејствата во Конектикат и катастрофа за бизнисите и работните места во нашата држава“.
Во тужбата се тврди дека само Конгресот има уставно овластување да наметнува тарифи, додека претседателот може да се повика на IEEPA само ако има „невообичаена и извонредна закана“ која доаѓа од странство.
„Со тоа што си припишува овластување да воведува големи и постојано променливи царини за секоја стока што влегува во Соединетите држави – врз основа на произволно прогласени национални вонредни состојби – претседателот го поткопува уставниот поредок и прави хаос на американската економија“, се наведува во тужбата, според Гардијан.
Минатата недела, гувернерот на Калифорнија, Демократот, Гевин Њусом, поднесе посебна тужба против администрацијата на Трамп пред федералниот суд во северниот округ на Калифорнија, тврдејќи дека неговата држава, како најголем увозник во Соединетите држави, може да изгуби милијарди долари приход поради тарифната политика.