Поранешниот премиер Димитар Ковачевски со ироничен статус на социјалните мрежи ја коментира одлуката на Советот на Општина Пехчево, чии советници едногласно се изјаснија против изградбата на дата-центри.
Ковачевски во објавата се осврнува на прашањето за потрошувачката на вода и влијанието што изградбата и функционирањето на големи дата-центри би можеле да го имаат врз локалните ресурси.
„Имала среќа Америка што Пехчево не е во Силиконска долина, а богами и Кина што Пехчево не е во Шангај…… што би правеле денес со вишокот вода“, напиша Ковачевски.
Неговата објава доаѓа откако советниците во Општина Пехчево едногласно се изјаснија против изградбата на дата-центри, со што проектот предизвика дополнително внимание во јавноста.
Со ироничниот коментар, Ковачевски алудира на дебатата околу потребите за вода на дата-центрите, но и на прашањето дали ваквите инвестиции се соодветни за локалните услови и ресурси.
Темата со изградбата на дата-центри во земјава предизвикува реакции и поради потенцијалното влијание врз животната средина, потрошувачката на вода и електрична енергија, како и придобивките што би ги имале локалните заедници.