Една едноставна утринска навика може да придонесе за подобро здравје на срцето – пиењето зелен чај, пишува „EatingWell“.
Срцевите заболувања и понатаму се меѓу водечките причини за смрт кај мажите и жените. Сепак, околу 80 отсто од случаите на кардиоваскуларни заболувања, вклучително и мозочниот удар, може да се спречат со поздрав начин на живот.
Зелениот чај содржи катехин наречен EGCG, соединение со антиоксидативни и антиинфламаторни својства. Според одредени истражувања, зелениот чај може да помогне во намалување на оксидативниот стрес и подобрување на функцијата на крвните садови, што е важно за здравјето на срцето.
Може да помогне во намалување на штетните масти во крвта
EGCG може да влијае врз намалувањето на нивото на штетните масти во крвта, како и на триглицеридите. Сепак, експертите нагласуваат дека зелениот чај не може да биде замена за здрава исхрана и редовна физичка активност.
Можно е да биде поврзан со помал ризик од мозочен удар
Голема анализа во која биле опфатени повеќе од 645.000 луѓе покажала дека лицата кои пиеле околу една до четири шолји зелен чај дневно имале околу 26 отсто помал ризик од мозочен удар во споредба со оние кои пиеле многу малку или воопшто не пиеле зелен чај.
Сепак, истражувачите нагласуваат дека податоците покажуваат поврзаност, но не докажуваат дека зелениот чај директно го намалува ризикот од мозочен удар.
Уште три утрински навики за здраво срце
Будење во исто време секој ден – редовниот распоред на спиење може да помогне во одржувањето на биолошкиот ритам, крвниот притисок и здравјето на срцето.
Избор на интегрални житарки – овесот, интегралниот леб и другите интегрални житарки се поврзуваат со помал ризик од срцеви заболувања.
Утринска прошетка – пешачењето е едноставен начин за подобрување на кардиоваскуларното здравје. Според експертите, не е неопходно секој ден да се достигнуваат 10.000 чекори. Околу 7.000 чекори дневно може да бидат поврзани со значително намалување на ризикот од смрт од кардиоваскуларни заболувања.