Енди Барнам станува седмиот британски премиер во последната деценија, ветувајќи дека ќе ја „преобликува“ земјата и дека поголем фокус ќе стави на прашањата што ги засегаат граѓаните, како кризата со трошоците за живот и слабите јавни услуги.
Откако Кир Стармер ќе го одржи прошталниот говор пред улицата „Даунинг стрит 10“ и официјално ќе му ја понуди оставката на кралот Чарлс, монархот ќе го прими Барнам и ќе побара од него да ја формира новата влада.
Потоа ќе започне тешката работа за 56-годишниот Барнам, кој како градоначалник на Голем Манчестер го доби прекарот „Кралот на Северот“.
Откако ќе го објави својот кабинет – кој веќе е предмет на големи дебати во владејачката Лабуристичка партија – тој ќе се соочи со долг список проблеми, од неефикасни комунални компании до слаб економски раст.
БАРНАМ ЌЕ ГО ПРЕТСТАВИ НОВИОТ ПРАВЕЦ НА ВЛАДАТА
Барнам во својот прв говор ќе претстави план за „постабилна и поодговорна политика“, соопшти неговиот кабинет.
Тој ќе го претстави своето назначување како момент за „размислување“ и ќе порача дека е време искрено да се зборува за предизвиците со кои се соочува Велика Британија, како и дека само политичката стабилност може да донесе подобрувања.
Во петокот, Барнам го опиша неговиот избор за лидер на Лабуристичката партија како „најзначајниот момент на промена во британската политика во последните 40 години“.
Тој вети радикална промена на политичкиот систем со цел побрзо зголемување на животниот стандард и помош за земјата која бара промени, за таа да стане место каде што „животот е подостапен и каде сите луѓе и сите региони ќе напредуваат“.
Оваа порака ја упати кон лабуристичките пратеници, кои го гледаат како еден од ретките политичари способни да се справат со заканата од популистичката партија Реформ УК на долгогодишниот активист за Брегзит, Најџел Фараж – нешто за што се сомневаа дека непопуларниот Стармер може да го направи.
Првиот предизвик на Барнам ќе биде изборот на неговиот владин тим, а особено на министерот за финансии. Несогласувањата во ова клучно партнерство во срцето на владата во минатото доведоа до пад на неколку администрации.
Еден од фаворитите за функцијата, министерот за енергетска безбедност и „нето нула“ политики, Ед Милибанд, бил предмет на критики во јавноста, додека министерката за внатрешни работи Шабана Махмуд сега се смета за фаворит за ова место.
Барнам во петокот ја повика својата партија да ги игнорира „шпекулациите“ и изјави дека сè уште не го донел конечниот избор за својот тим.
Неговите први политички одлуки исто така ќе бидат под внимателно следење.
Во неделата беа откажани плановите сите вработени задолжително да имаат дигитален документ за идентификација – мерка која требаше да помогне во борбата против илегалната миграција, но која беше оценета како „дебакл“ од страна на повеќепартиска комисија на пратеници.
Посебно внимание ќе биде посветено на одлуките за даноците и јавната потрошувачка, нафтата и гасот, како и на комуналните компании со слаби резултати, за кои Барнам сака поголема јавна контрола.
Thames Water, најголемата компанија за водоснабдување во Велика Британија, е оптоварена со долгови и се соочува со критики поради честите истекувања на отпадни води.
Во неделата, заменичката лидерка на Лабуристичката партија, Луси Пауел, сојузничка на Барнам, изјави дека „Thames Water“ може да биде ставена под „посебни мерки“, што би значело работење под директна владина контрола.
„Тој сака повторно да ги насочи и да им даде приоритет на владините ресурси и вниманието кон неговите приоритети – справување со кризата со трошоците за живот и вистинско преобликување на начинот на кој функционираат земјата и економијата“, изјави Пауел за „Скај њуз“.