Европската Унија денес свикува итен состанок на шефовите на дипломатиите на своите членки во обид да влијае на најавената средба меѓу американскиот и рускиот претседател Доналд Трамп и Владимир Путин за војната во Украина, стравувајќи од можен договор на штета на Киев.
Европејците одржуваат бројни контакти и се обидуваат да изградат заеднички фронт зад Украина откако беше објавено дека самитот Трамп-Путин ќе се одржи во Алјаска во петок.
Според мислењето на Трамп, треба да се разговара за можен договор што предвидува „размена на територии“ за да се стави крај на конфликтот што одзеде животи на десетици и стотици илјади луѓе за време на повеќе од тригодишната војна.
Како што стојат работите сега, присуството на украинскиот претседател Володимир Зеленски не е предвидено, иако тоа останува „можност“, според американскиот амбасадор во НАТО, Метју Витакер.
„Претседателот Трамп има право да каже дека Русија треба да ја заврши војната во Украина. САД имаат моќ да ја принудат Русија сериозно да преговара“, изјави шефицата за надворешна политика на ЕУ, Каја Калас.
Сепак, таа додаде дека секој договор меѓу САД и Русија треба да ги вклучи Украина и ЕУ, бидејќи тоа е безбедносно прашање за Украина и за цела Европа.
Таа за денес најави вонреден видео состанок на министрите за надворешни работи на земјите од ЕУ, во присуство на нивниот украински колега Андриј Сибига, за да разговараат за „следните фази“.
Во последните три дена, украинскиот претседател разговараше со 13 европски лидери, како и со претседателите на Казахстан и Азербејџан.
Покрај тоа, Зеленски нагласи дека Киев е постојано во контакт со САД.
„Не поминува ниту еден ден без наша комуникација за тоа како да постигнеме вистински мир. Јасно ни е дека Русија има намера да ја измами Америка“, рече Зеленски во својата вечерна порака.