Министерот за односи меѓу заедниците, Агон Ферати, на брифинг со новинарите ја претстави состојбата во која ја затекнал институцијата по преземањето на функцијата, најавувајќи реформи во работењето на Министерството и нов пристап во распределбата на ресурсите и грантовите.
Ферати рече дека Министерството, кое претходно го раководеле Артан Груби, а потоа и Иван Стоилковиќ, со години се соочувало со недостиг од стратешка ориентација, основни услови за работа и внатрешна кохезија.
Според него, од вкупно 139 вработени во Министерството, околу 30 проценти немале соодветни услови за извршување на своите работни задачи поради недостиг од основна опрема, вклучувајќи компјутери, бироа и работен простор.
Тој нагласи дека веднаш по преземањето на функцијата започнал процес за подобрување на кохезијата во Министерството, преку состаноци со раководителите на секторите и експерти со цел да се изнајдат начини за поефикасно функционирање.
Според Ферати, еден од главните проблеми е недостигот од стратешки документи, поради што институцијата немала јасна насока и долгорочна визија.
Ферати се осврна и на распределбата на грантовите, обвинувајќи дека во изминатиот период постоела нееднаквост во распределбата на средствата.
Според него, од 36 доделени грантови, 29 биле за српската заедница и српски здруженија, главно за организација на културни активности, при што еден грант изнесувал 500 илјади денари.
Говорејќи за својата визија, министерот повика на поголема соработка со медиумите, истакнувајќи ја нивната улога во зачувувањето на стабилноста и општествената кохезија.
Како пример ги посочи тензиите што се создаваат за време на спортските натпревари, при што, според него, навредите на стадионите често се шират на социјалните мрежи, а потоа се рефлектираат и во политичките институции.
Тој оцени дека една од причините за незадоволството меѓу заедниците е и начинот на распределба на инвестициите и јавната поддршка, сугерирајќи дека и во спортот треба да има поурамнотежен пристап.