Финансиска полиција до Јавното обвинителство поднесе кривична пријава против Лила Стојановска поради даночно затајување, пренесува порталот СДК. Стојановска се товари дека во три наврати примила парични средства во висина од 16.095.600 денари (260.000 евра). Парите биле исплатени од фирмата „Дан Мак“ по основ склучен договор за изготвување проект за интернационална асоцијација за заштита на човековите права.
„Расположивите парични средства како остварен приход пријавената Л.С. ги подигнала во целост во готово за себе лично, без да ги пријави во Годишната даночна пријава за 2017 година до Управата за јавни приходи. Не пресметала и не уплатила Персонален данок на доход во висина од 1.788.398 денари (29.000 евра), за кој износ го оштетила буџетот на Република Северна Македонија“, се вели во соопштението на Финансиската полиција.
Кривичната пријавата од Финансиската полиција следува откако кај нив била поднесена пријава од Друштвото за изградба и инжинеринг „Дан Мак“ Скопје и лицата Е.Н. и Д.Н. На сопствениците на фирмата Лила Стојановска им ветила дека со вложување во проектот за интернационална асоцијација за заштита на човекови права, ќе им обезбеди донации од 3,5 милиони евра.