Франција ќе се заложи за „санкции“ на европско ниво против Турција во време кога тензиите меѓу ЕУ и Анкара се зголемуваат по многу спорни точки, објави францускиот државен секретар за европски прашања, Клеман Бон, јави дописникот на МИА од Париз.
-Ние се залагаме за европски мерки на силна реакција, меѓу кои и за санкции, рече Бон пред Сенатот.
Според него, „последната епизода, која ги преминува границите на неприфатливото секој ден, претседателот Ердоган, кој го навредуваше претседателот на Републиката, ја открива (…)целокупната стратегија на Турција да прави сеопфатни провокации“.
Реџеп Таип Ердоган во понеделникот ги повика своите сограѓани да ги бојкотираат француските производи, неколку дена откако Париз го отповика својот амбасадор во Анкара откако шефот на турската држава го доведе во прашање „менталното здравје“ на неговиот француски колега. Турција го обвинува претседателот Емануел Макрон дека изразил поддршка за слободата за карикатура на пророкот Мухамед, за време на почит кон Самуел Пати, наставникот по историја со обезглавување за прикажување карикатури на Мухамед на час.
-Секогаш целта е истата: да се изврши максимален притисок врз своите соседи и особено врз ЕУ. Премногу долго сме наивни, рече Бон.
Покрај овие неодамнешни напади, во последните месеци се зголемија тензиите и споровите меѓу ЕУ и Турција. Откривањето во последните неколку години на огромни полиња со гас на истокот на Средоземното Море го разбуди апетитот на крајбрежните земји како што се Грција, Кипар, Турција, Египет и Израел и ги обнови споровите околу морските граници. По европскиот самит кон средината на октомври во Брисел, претседателот на Европскиот совет Шарл Мишел го критикуваше продолжувањето на истражувањето за гас на истокот на Медитеранот од страна на Турција и потсети дека ЕУ планира да ја процени ситуацијата во декември со цел да воведе можни санкции.
Анкара е воено ангажирана и во Либија, како поддршка на владата на националното единство и во Сирија против курдските сили, сојузници на меѓународната коалиција против џихадистичката група Исламска држава, на која и припаѓаат неколку членки на ЕУ. Турската Влада ги поддржува и азербејџанските сили ангажирани против ерменските сепаратисти во Нагорен Карабах.
Турција исто така е под закана од американски санкции откако неодамна тестираше, на жалење на Вашингтон, софистициран систем за противвоздушна одбрана С-400, стекнат од Русија и покрај предупредувањата од НАТО.