Европската интеграција не треба да биде само процес на усогласување на законите и исполнување на критериумите, туку треба да донесе промена на системот и подобар животен стандард за граѓаните, изјави претседателот на Собранието, Африм Гаши.
На Граѓанскиот форум „Северна Македонија и иднината на Европа“, Гаши истакна дека граѓаните треба постојано да бидат вклучени во процесот на европската интеграција и дека европската агенда треба да биде долгорочна обврска, надвор од партиските интереси.
„Тоа е процес кој треба да овозможи суштинска промена на системот, со функција на обезбедување подобар животен стандард за сите нас. Затоа, кога зборуваме за Европската Унија, ќе зборуваме за подобро образование, подобра здравствена заштита, достоинствени работни места, функционални институции, еднаква правда, борба против корупцијата и создавање услови младите да гледаат кон својата иднина“, рече Гаши.
Евроратеникот од Австрија, Томас Вајц, посочи дека европската интеграција не треба да се гледа само како крајна цел, туку како процес кој треба да донесе конкретни придобивки за граѓаните. Тој ја истакна потребата од решавање на проблемите со загадувањето на воздухот, дивите депонии, рециклирањето, пречистителните станици, рудниците и шумарството.
„Верувам дека само земја која се грижи за основните работи – чист воздух, чиста вода, добри услови за живот – може да процвета и економски. Сето тоа има директно економско влијание. Дали ќе бидете здрави за да одите на работа, или денес сте болни и не можете да одите на работа? Тоа директно влијае врз општеството“, рече Вајц.
Политичарите треба да ја вршат својата работа не само за граѓаните, туку заедно со граѓаните, порача словачкиот европратеник Бранишлав Ондруш.
„Промената на логото на европската ознака во Македонија. Некои од вас можеби се сеќаваат дека пред 5-6 години логото беше „EU for you“, односно „ЕУ за вас“. Пред четири години, делегацијата одлучи да го промени логото во „EU with you“, што значи „ЕУ со вас“, а не „за вас“. За мене, како политичар, ова е важна промена, важен симбол“, истакна словачкиот европратеник Ондруш.
Да потсетиме, Македонија треба да го измени Уставот за да продолжи процесот на пристапување кон ЕУ. Измените предвидуваат внесување на Бугарите и други заедници во Уставот и бараат двотретинско мнозинство во Собранието. Без нивно усвојување, преговорите со ЕУ не можат да напредуваат.