Во Лондон се одржа протест на кој се собраа илјадници демонстранти кои маршираа низ центарот на градот за да ја одбележат годината од почетокот на пандемијата.
Меѓу собраните имало луѓе од целиот спектар на борба за слобода – од оние кои веруваат дека Бил Гејтс го користи коронавирусот за обезличување на светската популација, до анти-вакцини и други скептици до оние кои не се согласуваат со владините политики и мерки на Борис Џонсон.
Сепак, во сето ова, заклучувањето е истакнато како голем проблем.
„Тука сум затоа што се борам за човековите права“, рече уметничката Ана од Италија, која вели дека заклучувањето ја довело до работ на самоубиство.
„Минатата година требаше да биде најдобрата година во мојот живот. По повеќе години на снимање на мојот филм, Бордерлајн требаше да биде премиерно прикажан ова лето во Кореја, но беше откажан поради заклучување. Тоа беше најлошата година во мојот живот“.
Ана вели дека нејзините родители се лекари, и поради несогласувања околу пандемијата, тие престанале да комуницираат.
Третото заклучување во сила
Во Велика Британија, во сила е третата национална блокада, која беше објавена на почетокот на годината кога имаше рекорди на заразени, па можеше да има дури и 60.000 новоинфицирани дневно. Отворањето на училиштата пред десет дена го означи првиот чекор кон постепен излез од заклучувањето, а следниот голем чекор се очекува на 12 април, кога ќе се отворат пабови, ресторани, продавници, спортски сали, фризери, кина, музеи и слично.
Досега, 26 милиони луѓе во земјава ја примиле првата доза на вакцината, додека околу два милиони луѓе ја примиле втората доза. Тоа е повеќе од една третина од земјата што ја прими првата доза, а веќе се на ред луѓето од возрасната група од 50 години.
Изминатата недела беше обележана со скептицизам во врска со вакцината АстраЗенека, поради што значителен број европски земји накратко ја прекинаа програмата за масовна вакцинација. Сепак, Европската агенција за лекови, по дополнителна проверка, заклучи дека вакцината е безбедна, а со цел да се отстранат сите сомнежи во врска со вакцината, премиерот на Велика Британија Борис Џонсон вчера ја доби својата прва доза пред камерите.