По пријава за појава на непозната супстанција која преку реката Лепенец се влева директно во Вардар, градските и државните инспекциски служби веднаш излегоа на терен за да ја лоцираат причината за потенцијалното еколошко загадување.
На терен веќе се ангажирани екипите на Град Скопје и Министерството за животна средина и просторно планирање, а ситуацијата се следи и од воздух.
„Нашите инспекциски служби реагираа без одложување. Пуштен е дрон за детектирање на изворот на оваа појава, а екипите на ЈП ‘Водовод и канализација’ земаа мостри од водата за итн итно лабораториско испитување. Толеранција за загадувачите нема да има — секој што го загрозува здравјето на граѓаните и околината ќе биде соодветно санкциониран“, истакна градоначалникот на Град Скопје, Орце Ѓорѓиевски.
Од Град Скопје информираат дека се во постојана комуникација со надлежното Министерство и ресорниот министер.
Подетални информации за видот на материјата и евентуалниот причинител се очекуваат веднаш по завршувањето на лабораториските анализи и инспекцискиот увид на терен.