Обвинителството не смее да се потпира исклучиво на предметите што ги доставува Министерството за внатрешни работи, туку мора да постапува и по информации што укажуваат на можни кривични дела од јавен интерес. Ова го порача кандидатката за шеф на Обвинителството за гонење организиран криминал и корупција, Искра Хаџи Василева, во емисијата „Клик Плус“ на ТВ21.
Одговарајќи на прашањето дали ќе даде предност на предметите доставени од МВР или на постапувањето по „допрен глас“, Хаџи Василева истакна дека двата начина на работа се важни, а нивната примена зависи и од расположливите ресурси и времето потребно за постапување.
„Со Министерството за внатрешни работи добивате веќе одреден производ кој е во одредена фаза, каде што основаното сомневање како стандард е веќе исполнето. Се разбира дека ќе работиме и со МВР и по допрен глас“, изјави Хаџи Василева.
Таа нагласи дека обвинителите имаат обврска да реагираат кога постојат информации за можни незаконитости што бараат кривичноправно преиспитување, дури и кога за нив претходно не е доставена пријава од полицијата.
„Допрениот глас е нешто што нè обврзува. Ние работиме за граѓаните и треба да работиме за јавниот интерес, таму каде што навистина би се оценила потреба од наша интервенција во кривичноправна смисла“, посочи таа.
Сепак, Хаџи Василева предупреди дека не секој проблем во општеството може или треба да се решава преку кривична постапка.
Според неа, постојат случаи за кои е потребна интервенција од инспекциските служби или системско решавање на проблемите, наместо постапување на Јавното обвинителство.
„Не сите работи можете да ги решите со кривично право. Имате многу проблеми кои бараат инспекциска или системска интервенција“, истакна Хаџи Василева.
Таа појасни дека одлуката за отворање предмет по „допрен глас“ треба да се темели на проценка дали конкретните околности навистина бараат обвинителско постапување.
„Онаму каде што заслужува јавнообвинителска интервенција и има потреба од кривичноправно преиспитување на дадена ситуација, ќе работиме и тоа како по допрен глас“, нагласи кандидатката.
Со ваквиот пристап, Хаџи Василева најави дека, доколку биде избрана за шеф на Обвинителството за организиран криминал и корупција, ќе се залага за постапување и по предмети доставени од надлежните институции и по информации од јавноста, со проценка на законските основи и расположливите капацитети.