Иранските власти се заканија дека репрезентацијата може да ги прекине своите натпревари на Светското првенство доколку на трибините се појават неовластени знамиња или се скандираат пораки насочени против националниот тим.
Според иранските медиуми, министерот за спорт Ахмад Доњамали изјавил дека Иран веќе ја информирал ФИФА за својата позиција во пресрет на турнирот, кој започнува во четврток.
„Ја известивме ФИФА дека доколку на стадионите каде што игра Иран бидат внесени неофицијални знамиња или се упатуваат слогани против националниот тим, тим-менаџерот ќе биде должен да побара прекин на натпреварот“, изјавил Доњамали.
Иранската репрезентација ќе го започне настапот во Групата Г на 15 јуни против Нов Зеланд во Лос Анџелес. Потоа ќе се соочи со Белгија на 21 јуни на истиот стадион, а последниот натпревар од групната фаза ќе го одигра против Египет на 26 јуни во Сиетл.
Според Доњамали, иранските власти добиле уверувања дека за време на натпреварот против Египет нема да има инциденти на трибините.
Контроверзиите околу настапот на Иран на турнирот се засилија откако локалните организатори во Сиетл го означија дуелот меѓу Иран и Египет како „Pride Match“, во рамки на викендот посветен на поддршка на ЛГБТК+ заедницата. Фудбалските федерации на Иран и Египет претходно побараа од ФИФА да спречи активности поврзани со движењето „Прајд“ за време на натпреварот.
Во април, демонстранти се собраа пред Конгресот на ФИФА во Ванкувер и побараа Иран да биде исклучен од Светското првенство. Тие тврдеа дека репрезентацијата ја претставува Исламската револуционерна гарда, а не иранскиот народ.
Дополнителни проблеми за иранскиот тим предизвика и одлуката на националната фудбалска федерација да соопшти дека нејзината квота за билети била повлечена непосредно пред почетокот на турнирот. Поради тоа, дел од навивачите кои веќе направиле патни аранжмани останале без можност да присуствуваат на натпреварите на својата репрезентација.
Иранската селекција во моментов се подготвува во Тихуана, Мексико. Според американското Министерство за внатрешна безбедност, на тимот ќе му биде дозволен влез во САД еден ден пред секој натпревар, во услови на зголемени тензии и конфликт кој дополнително му дава геополитичка димензија на турнирот.