Истражувачката репортерска лабораторија (ИРЛ) објави дека обдукциските наоди и сведоштвата од терен отвораат сериозни дилеми за причината за смртта на жртвите во пожарот во кочанскиот ноќен клуб „Пулс“. Иако кај 50 лица официјално е наведено труење со јаглерод моноксид, кај ниту едно од нив не биле утврдени фатални концентрации на овој гас.
Според ИРЛ, хемиското и градежното вештачење, како и исказите на преживеаните, укажуваат дека при пожарот гореле материјали кои испуштаат смртоносни токсични гасови, меѓу кои и водороден цијанид, настанат од согорување на полиуретански сунѓер.
Медицинските лица опишуваат ненадејни колапси и смрт за неколку минути, клиничка слика што, како што наведува ИРЛ, не одговара на класично труење од чад.
И покрај овие индиции, во обдукциите не биле направени анализи за присуство на цијанид, поради што, според ИРЛ, клучното прашање за вистинската причина за смртта на жртвите и натаму останува без одговор.
Извор: ИРЛ