Американскиот претседател Доналд Трамп објави дека се започнати подготовките за средба меѓу рускиот и украинскиот претседател Владимир Путин и Володимир Зеленски. Во соопштение на социјалната мрежа Truth Social, Трамп ја нарече средбата со украинскиот претседател Володимир Зеленски и другите европски партнери „многу добра“.
Во Белата куќа присуствуваа францускиот претседател Емануел Макрон, италијанската премиерка Џорџија Мелони, германскиот канцелар Фридрих Мерц, финскиот претседател Александар Стаб, британскиот премиер Кир Стармер, претседателката на Европската комисија Урсула фон дер Лајен и генералниот секретар на НАТО Марк Руте.
Трамп кажа дека во текот на средбата телефонски разговарал со Путин, за да договори средба меѓу украинскиот и рускиот претседател. Зеленски истакна дека е подготвен билатерално да се сретне со Путин, потенцијално и со Трамп.
Амедиканскиот претседател рече дека безбедносните гаранции за Украина ќе бидат „обезбедени“ од европските земји во координација со САД. Британскиот премиер Кир Стармер кажа дека разговорите за безбедносните гаранции ќе продолжат и денеска.