Претседателот на Јужна Кореја, Ли Џае-Мјунг, им наложи денеска на државните институции и локалните власти да преземат сеопфатни мерки за заштита на граѓаните од екстремните жештини, бидејќи се очекува температурата во Сеул да достигне 39 степени Целзиусови.
Топлотниот бран, во кој загинаа повеќе од 20 лица, би можел да го приближи Сеул до рекордот од 39,6 степени Целзиусови, кој беше регистриран во август 2018 година.
– Екстремните жештини какви што никогаш порано не сме доживеале продолжуваат од ден на ден. Условите кои порано се гледаа само во вестите од странство сега станаа наша реалност – рече Ли на состанокот посветен на одговорот на топлотниот бран.
Јужнокорејскиот претседател им наложи на министерствата и локалните самоуправи да ги мобилизираат сите расположливи луѓе и ресурси додека екстремните жештини не попуштат, со посебен акцент на заштитата на животот и безбедноста на граѓаните, дополнителна грижа за ранливите групи и построга примена на задолжителните паузи за работниците кои работат на отворено за време на најтоплиот дел од денот.
Во Сеул имаше уште една тропска ноќ, а во одделни делови од градот температурата не падна под 30 степени Целзиусови, соопшти Корејската метеоролошка администрација.
Вкупно 2.441 пациент ги посетиле итните служби поради состојби поврзани со жештините до вторникот, сметано од средината на мај кога властите го активираа системот за следење на болестите поврзани со топлотниот бран, според податоците на Корејската агенција за контрола и превенција на болести.
Метеоролозите наведуваат дека тајфунот Делфин, иако не претставува директна закана за Јужна Кореја, придонесува за топлотниот бран. Според податоците на Корејската метеоролошка администрација, тајфунот ги засилува источните ветрови кои, преминувајќи преку планинскиот масив на Корејскиот Полуостров, носат врел и сув воздух во западните делови од земјата, дополнително зголемувајќи ги температурите во Сеул и во другите подрачја.