Се случија долгоочекуваните концерти на дуото Дац и Александар поветени на жената и љубовта, на 6 и 7 март во МНТ. Милениците на женската публика на сите присутни им подарија несекојдневно искуство кое ќе го паметат за цел живот. Секогаш оригинални и уникатни, Дац и Александар повторно ги поместија границите на нивните настапи и донесоа многу љубов и енергија во преполниот салон на МНТ. Според многумина, ова не беше обичен концерт, тоа беше вистински емотивен филм од почеток до крај.
Имаше нешто посебно во воздухот уште пред да започне концертот во Македонскиот народен театар.
Фоајето беше исполнето со насмевки, коктели и разговори, додека музиката на диџејот Миле Ѓуриќ создаваше чувство дека вечерта ќе биде повеќе од обичен концерт. Дамите пристигнуваа дотерани, некои со елеганција што носи животно искуство, други со младешка возбуда – спој на генерации обединети од љубовта кон музиката.
Токму таа сцена беше првиот знак дека „Дамите бираат“ нема да биде само уште една музичка вечер, туку вистински празник на емоциите.
Концертот започна и заврши во филмска атмосфера со сцена во која директорот Никола Кимовска ја донесе и пушти плочата на Дац и Александар на стариот грамофон, се разлејаа нотите на “Уште ми фалиш” и приказната започна. На крајот на концертот, тој ја извади плочата од грамофонот со што симболично ја заврши целата приказна.
Сцена што личеше на дом
Кога публиката се упати во салата, класичната театарска сцена веќе беше претворена во интимен музички салон.
Масичка, фотељи и топло осветлување создаваа впечаток дека Дац и Александар не настапуваат на концерт – туку ги пречекуваат гостите во својата дневна соба.
Сценографијата беше дополнета со такси возило, клупа и канделабра која асоцираше на стиховите: “Уште стои таа клупа/ кај што такси те остава…”
А на големиот екран зад сите нив се редеа приказни кои преку стилизирани слики на сцени направени од хартија кои ги коментираа песните.
Во таа атмосфера започна музичка приказна која ги спои песната, актерската игра и непосредната комуникација со публиката.
Приказна за пријателство што станала музика
Во текот на вечерта, дуото се наврати и на почетоците на нивната соработка.
Една спонтана песна на забава, малку убедување од композиторот Григор Копров и една идеја што прераснала во дуо. Така се родила нивната прва заедничка песна „Цреши охридски“, која подоцна ќе стане еден од нивните препознатливи музички моменти.
Од таму, патувањето продолжи низ низа песни што одамна се дел од колективната меморија.
Носталгија што ја крена публиката на нозе
На сцената се нижеа нивни хитови и неколку познати евергрини што ги пееше целата сала – од нивната прва песна “Цреши охридски”, “Срце тетовирано” „Црвени рози за вас мадам“, „Кажи нешто драга“ се до главната носечка песна која беше лајтмотив на вечерта „Уште ми фалиш“.
Во тие моменти границата меѓу сцената и публиката исчезна. Бината беше спуштена и споена со публиката, за да дојде до израз препознатливиот знак на настапите на Дац и Александар – да бидат постојано меѓу публиката која пее и игра со нив.
Салата не беше само гледалиште – туку голем хор што пееше во еден глас.
Легенди на сцена и аплауз што не престануваше
Концертот доби дополнителна тежина со гостувањето на неколку големи имиња од македонската музика.
Виолета Томовска ја изведе безвременската „Молитва“, а Росана Сариќ-Тодоровска со „Признавам“ уште еднаш покажа зошто нејзиниот глас е дел од музичката историја. Публиката ги испрати со долг аплауз и стоечки овации, а тие се заблагодарија на Дац и Александар дека се сетиле на нив и дека навистина уживале во целиот концерт.
На сцената се појави и Димитар Чуле кој ја изведе “Црвени рози” од легендарниот Маниќ и Биљана Ѓошева која со дуото ја отпеа “Воли ме сакај ме”.
Тука беа и нивните пријатели музичари, придружени од составот „Дрим тим“, а на бисот се појави и директорот на МНТ, Никола Кимовски, седна зад тапаните – момент што ја развесели салата.
Кога концертот се претвори во диско
Во вториот дел од вечерта атмосферата се промени.
Се спушти диско топката, конфети се разлеаја над сцената, а салата се претвори во вистинска музичка арена. Песните се редеа една по друга, а публиката танцуваше, пееше и аплаудираше без пауза.
Љубов во живо пред цела сала
Една девојка од публика (а потоа се дозна дека е тоа пејачката Тијана Периќ) беше повикана на сцената како добитничка на награда.
Она што следеше никој не го очекуваше.
Гитаристот Иван Петровски клекна пред неа со прстен во рака и ја побара за жена. Во салата настана молк, а потоа – громогласен аплауз.
Тоа беше момент кога концертот се претвори во нешто повеќе – жив доказ дека музиката и љубовта понекогаш се случуваат на истата сцена.
Посвета за жените
Во пресрет на 8 Март, дуото испрати и порака дека жените заслужуваат внимание секој ден. За тој магичен момент, тие не ги заборавија ниту нивните најмали соработници, големиот детски хор на Златно славејче кои заедно со нив ја отпејаа песната “Секој ден е 8 март” и на крајот поделија цвеќиња на дамите во публиката.
На крајот од вечерта Дац и Александар ги поканија своите сопруги на сцената и им оддадоа јавно признание – гест што ја заокружи вечерта со искрена и топла емоција.
Вечер што се памети
Концертите „Дамите бираат“ не беа само концерти.
Беа мешавина од кабаре, театар, музичка носталгија и искрени човечки моменти.
Вечер во која песните се нижеа како спомени, а публиката си замина со чувство дека била дел од приказна што нема лесно да се повтори.
И можеби токму во тоа е тајната на Дац и Александар – не ја носат музиката само на сцената, туку ја претвораат во живот што се споделува со публиката.
Вечерва заврши со коктел и музичко дружење со Боби Јоргушески, а ѕвездите на вечерта Дац и Александар вечерта ја продолжија со дружење и фотографирање со публиката.
Двата концерти беа рекордно распродадени, а според зборовите на директорот на МНТ, Кимовски “можеа да се распродадат дури 5 концерти на Дац и Александар”. Настаните поминаа во врвна реализација на Македонскиот Народен Театар, а спонзори на концертите кои помогнаа да се оствари оваа идеја на дуото беа Витаминка, Макпетрол, Кожувчанка, Халк Банка, Македонија осигурување АД, Тиквеш и Спортлајф.
Концертот се снимаше од страна на Телевизија ТЕЛМА и наскоро ќе може ексклузивно да се погледне на нивната програма.
Поради големиот интерес за нивните концерти се објави и нов датум за отворањето на Летната сцена на МНТ “Славиша Кајевски”, која годинава оди под наслов “СК Уште ми фалиш”. Дац и Александар и нивните гости ја отвораат летната сцена на 18 јуни со голема евергрин забава за сите генерации под отворено небо, а билетите за тој настан ќе можат веќе од денес да се набават на билетарницата на МНТ и онлајн.
Фотографии:
Маја Аргакијева
Мики Трајковски Манца