Еврокомесарката за проширување Марта Кос изјави дека политиката на проширување на ЕУ станала прашање на европска безбедност и дека Европејците мора да преземат одговорност за својата иднина.
Таа ги нарече земјите-кандидатки за ЕУ „слепи точки“ на континентот кои мора да се „отстранат за да преживее Европа во битката со моќните политики кои повторно го завладеа светот“.
„И еднаш засекогаш мора да престанеме да очекуваме другите да ја завршат нашата работа и да одлучуваат за безбедносната архитектура на нашиот континент. Ако Европејците сакаат место на сопствена маса, ние мора да можеме да дејствуваме и да покажеме единство“, рече таа.
Посочи дека Унијата плаќа цена на многу начини, бидејќи во минатото била предолго фокусирана „сама на себе“.
„Не дејствувавме доволно решително на Западен Балкан и дури не ни помисливме на членството на Украина и Молдавија до 2022 година. Сега мора да ја завршиме работата под многу потешки околности“, рече Кос.
Многумина, како Хабсбурговците, Римјаните, Наполеон, рече таа, се обиделе да го обединат континентот, но сега, за прв пат, постои реална шанса тоа да се случи.
„Проширувањето повеќе не е исто, се случуваат многу промени. Соочени сме не само со Русија, туку се соочуваме и со повлекувањето на САД од нашето непосредно соседство, што ќе ја намали децениската политика на поддршка на демократските гласови, независните медиуми и ефикасното судство. Ова претставува директен безбедносен предизвик. Денес е јасно дека, ако сакаме мир и безбедност на нашиот континент, ние Европејците мора да преземеме одговорност за нашата иднина“, рече Кос.