Полицијата откри сомнежи за сериозни злоупотреби при користење на државните мерки за вработување, при што четири компании, нивните сопственици и едно службено лице се осомничени дека незаконски прибавиле повеќемилионска финансиска корист.
Од Министерството за внатрешни работи информираа дека Надворешната канцеларија за криминалистички работи Пробиштип поднела кривична пријава против четири правни лица од Пробиштип, нивните сопственици и управители – Г.Д. (60) од Штип, Т.А. (63), Н.И. (50) и О.Ч. (58) од Пробиштип, како и против И.П. од Пробиштип, вработен во Агенцијата за вработување на Република Северна Македонија – Центар за вработување Пробиштип.
Тие се сомничат за продолжени кривични дела „злоупотреба на постапката за јавен повик, доделување договор за јавна набавка или јавно-приватно партнерство“, „злоупотреба на службената положба и овластување“ и „перење пари и други приноси од казниво дело“.
Според истрагата, пријавените фирми и нивните управители, во договор со тогашниот раководител на Центарот за вработување во Пробиштип, се пријавиле на јавен повик за добивање неповратна финансиска помош во рамки на владината мерка од 2024 година наменета за вработување на невработени лица од ромската заедница.
Наместо лица кои ги исполнувале условите, тие вработиле лица кои не биле Роми и кои претходно имале работен стаж. Според МВР, нивниот работен стаж незаконски бил избришан од евиденцијата на Агенцијата за вработување, со што им било овозможено да ги исполнат условите за користење на мерката.
Со ваквите незаконски дејствија, осомничените противправно присвоиле средства и предизвикале штета на Буџетот на Агенцијата за вработување во вкупен износ од 3.520.000 денари.
Против сите осомничени се поднесени кривични пријави, а надлежните институции ќе ја продолжат постапката за целосно расчистување на случајот и утврдување на евентуална дополнителна одговорност.