Девојче помладо од две години вчера трагично го загубило животот во Германија, откако мајката го заборавила во автомобил и го оставила со часови на високи температури.
Трагедијата се случила во градот Шорндорф, во близина на Штутгарт. Според првичните информации, мајката го оставила девојчето во паркиран автомобил неколку часа.
Малото девојче починало само, изложено на неподносливата пладневна жештина.
Како што соопшти полицијата во средата вечерта по првичните резултати од истрагата, жената (44) наводно едноставно ја „заборавила“ својата околу 20-месечна ќерка во автомобилот. Кога се вратила нешто пред 15 часот и, според досегашните сознанија, самата побарала помош за веќе безживотното дете, било предоцна.
„Иако лекар од итната помош и спасувачките служби веднаш започнале реанимација, детето било прогласено за мртво на местото на настанот“, соопшти полицијата.
Трагедијата се случила на паркинг пред една хала. Во тоа време температурата надвор изнесувала околу 28 степени Целзиусови во сенка, додека внатрешноста на автомобилот најверојатно за кратко време достигнала опасно високи температури. За деца и домашни миленици, дури и неколку минути во такви услови можат да бидат животозагрозувачки.
Засега не е познато каде се наоѓала мајката додека детето било оставено во автомобилот.
Против неа е отворена истрага под надзор на обвинителството. Наредена е и обдукција за да се утврди точната причина за смртта.
Полицијата го обезбедила местото на трагедијата, собирала докази и разговарала со можни сведоци. На терен биле ангажирани и припадници на Германскиот Црвен крст, како и тимови за психолошка поддршка во кризни ситуации.