Протестите во Лос Анџелес траат со денови, првично предизвикани од рации и депортации на мигранти. Протестите станаа насилни, а американскиот претседател Доналд Трамп ја распореди Националната гарда во градот без согласност на државата.
Американската војска привремено ќе распореди околу 700 маринци во Лос Анџелес додека не пристигнат повеќе војници од Националната гарда, што означува уште една ескалација во одговорот на претседателот Доналд Трамп на уличните протести. Американски функционер, кој зборуваше под услов да остане анонимен, рече дека баталјон од маринците ќе биде испратен на привремена должност додека на местото на настанот не пристигнат повеќе војници од Националната гарда.
Пентагон објави дека Доналд Трамп наредил распоредување на уште 2.000 војници од Националната гарда. Не е познато кога остатокот од почетната група, како и новите сили објавени денес, ќе пристигнат во Лос Анџелес.
Во необичен потег, Трамп ја донесе одлуката спротивно на желбите на гувернерот на Калифорнија, Гевин Њусом, кој се спротивстави на испраќањето федерални трупи во неговата држава за да ги смират протестите против имиграцијата.
Калифорнија попладнево поднесе тужба против администрацијата на Трамп, барајќи од судот да го прогласи повикувањето на Националната гарда за неуставно и да спречи каква било идна мобилизација.
Автобусите се полнат со уапсени демонстранти во Лос Анџелес додека полицијата врши рации по улиците и ја растерува преостанатата толпа, јавуваат репортерите на Си-Ен-Ен од терен.
Репортерот на Си-Ен-Ен, Мајкл Јошида, известувајќи од центарот на Лос Анџелес, опиша како видел полиција како формира ред и се движи кон групата демонстранти, кои веќе се разредувале откако протестирале цел ден во близина на притворниот центар во градот.