Разговори, најверојатно снимани во канцеларија на Орце Камчев, се слушаат во продолжението од судењето за „Рекет“.
Гласови кои личат на Бојан Јовановски, Ана Камчева, Орце Камчев и Зоран Милевски – Кичеец, се слушаат на доказите кои ги презентира обвинителката Трајчевска.
„Мене не ме интересира, ни жена, ни маж, мене ме интересира само Боки“, се слуша во разговорите, а гласот личи на сведокот Орце Камчев.
Во судница продолжуваат да се презентираат материјалните докази, за кои одбраната негираше дека се монтирани и не ги прифаќаат затоа што се нелегални снимени.
Од Обвинителството одговорија дека за овие снимки немаат датум и време затоа што се прибавени со ПИ мерки. Додаваат дека онака како што сведокот Камчев ги доставил до нив, тие така ги презентираат.