Албанскиот претседател Илир Мета на својот профил на Фејсбук, попладнево објави дека за време на посетата на Косово, се сретнал со Мирослав Лајчак, специјален пратеник на ЕУ во дијалогот Белград-Приштина.
Како што наведува во објавата, Мета му кажал дека Албанија целосно го поддржува дијалогот меѓу Белград и Приштина и оти е време да се постигне договор за меѓусебно признавање на двете земји.
-Му кажав дека Албанија целосно го поддржува процесот на дијалог Косово-Србија. Исто така оценив дека сега е време да се постигне договор за меѓусебно признавање на двете земји, напиша Мета на Фејсбук.
Додава дека на средбата била истакната важноста на Берлинскиот процес, како и на сите други иницијативи кои можат да придонесат за регионалната и европската интеграција на регионот.