Премиерот Христијан Мицкоски признава дека Северна Македонија сè уште има сериозни слабости во областа на сајбер-безбедноста, поради старата и несоодветна дигитална инфраструктура.
„Нашата архитектура не е многу погодна. Тоа е товар и наследство од минатото“, изјави Мицкоски.
Тој посочи дека земјата има секундарен, односно резервен центар за податоци, но нема примарен дата-центар кој би ги опфатил сите јавни институции, а по потреба и приватниот сектор.
Според Мицкоски, тоа значи дека институциите во моментов во голема мера сами ја обезбедуваат својата дигитална инфраструктура, што го прави полето за потенцијални сајбер-напади многу широко.
Како дел од реформската агенда со Европската Унија, Владата планира изградба на примарен дата-центар, кој ќе биде поврзан со постојниот секундарен центар за опоравување, како и со облак-систем како дополнително ниво на заштита.
Мицкоски очекува проектот да започне на почетокот на следната година.
Финансирањето, како што посочи, ќе биде обезбедено преку грантови и поволен заем со ниска каматна стапка, чија отплата би започнала од 2035 година.
„Имаме план за нова архитектура. За жал, таа архитектура не постои во моментов, но сме позитивни и ќе го следиме планот. Сигурен сум дека наскоро ќе бидеме многу поотпорни отколку што бевме во минатото“, рече Мицкоски.
Премиерот нагласи дека сајбер-безбедноста е особено важна за земја членка на НАТО, бидејќи, како што рече, безбедноста на целата алијанса зависи и од отпорноста на секоја од нејзините членки.