Епидемиолошката состојба во Гостивар и понатаму се следи од здравствените институции, додека надлежните соопштуваат дека бројот на прегледи е во опаѓање, пренесува ТВ21.
Според Министерството за здравство, на 3 август биле регистрирани 78 прегледи, што е за шест помалку во споредба со претходниот ден, кога биле евидентирани 84 случаи за преглед.
Во меѓувреме, најновите анализи потврдуваат дека бактеријата Pseudomonas aeruginosa и понатаму е присутна во водоводната мрежа во Гостивар. Поради ова, водата сè уште не се препорачува за пиење и за подготовка на храна, иако е оценета како технички исправна. Според надлежните, оваа бактерија може да предизвика инфекции на кожата, очите, ушите, уринарниот тракт и белите дробови, особено кај лицата кои се почувствителни.
Институциите апелираат граѓаните и понатаму да ги почитуваат препораките сè додека не се потврди дека водата е целосно безбедна за употреба.