Најмалку 157 лица загинаа во разорните поплави и одрони на кал што го погодија Непал, соопшти локалната полиција. Спасувачките екипи продолжуваат со потрагата по исчезнати, а властите стравуваат дека бројот на жртвите дополнително ќе се зголеми.
Најтешко е погоден округот Читван, каде што се пронајдени 64 тела. Во Дадинг се регистрирани 27 жртви, во Навалпараси Ист 22, а во Горка 19. Смртни случаи се пријавени и во Нувакот, Танахун и Расува.
На погодените подрачја досега се испратени повеќе од 3.300 полицајци, додека 49 повредени лица се згрижени во болниците.
Според непалските власти, една од можните причини за катастрофалните поплави е одрон на голема количина мраз, најверојатно од глечер, на тибетската страна на Хималаите. Одронот можел да повлече карпи и наноси, кои привремено го блокирале текот на реката Лхенде. Последователното пробивање на насобраната вода предизвикало силен поплавен бран.
Американскиот геолошки институт претходно соопшти дека настанот бил погрешно регистриран како земјотрес со магнитуда 4,4 и дека дополнителната анализа покажала дека сеизмичката енергија била предизвикана од одрон.
Снимките од погодените области покажуваат огромни количества вода и кал кои носат возила и оштетуваат објекти. Спасувачките служби продолжуваат со операциите, додека експертите преку сателитски снимки се обидуваат прецизно да ја утврдат причината и размерите на катастрофата.