Над 70 илјади граѓани се пријавиле за бесплатна вакцинација против сезонски грип преку електронската платформа vakcinacija.mk, информираат од Министерството за здравство.
Според последните податоци, досега се пријавени вкупно 70.185 лица, додека вакцината ја примиле 6.282 граѓани од ризичните категории.
Вакцинацијата се спроведува на 31 пункт низ државата, од кои пет се во Скопје – во поликлиниките Идадија, Битпазар и Ѓорче Петров, како и во Центарот за јавно здравје и Институтот за јавно здравје.
Право на бесплатна вакцина имаат лицата над 65 години, хронично болните, здравствените работници, бремените жени и децата на возраст од шест месеци до пет години.
Граѓаните кои припаѓаат на овие категории можат да се пријават преку платформата vakcinacija.mk.