Најмалку 62 лица загинаа по неколкудневните обилни дождови и поплави во северната индиска сојузна држава Утар Прадеш, соопштија во понеделникот локалните власти.
Владата на државата соопшти дека 46 лица се повредени, а повеќе од 1.000 куќи се оштетени, откако тридневните обилни врнежи предизвикале поплави во неколку области.
Училиштата денес беа затворени во делови од државата, вклучително и во главниот град Лакнау, додека спасувачките екипи ги евакуираа жителите од поплавените подрачја и ги префрлаа на побезбедни локации.
На жителите им беше препорачано да избегнуваат непотребно патување низ поплавените подрачја и да се држат подалеку од надојдени реки, потоци и одводни канали.
Се очекува дождовите да ослабнат од денеска, бидејќи временскиот систем над Бенгалскиот Залив слабее, изјави Атул Кумар Синг, висок научник во Регионалниот метеоролошки центар во Лакнау. Тој додаде дека слаб дожд може да продолжи во источните и западните делови на државата до вторник.
Поплавите ја погодија и источната индиска држава Одиша, каде што повеќе од 75.000 луѓе биле евакуирани на побезбедни места, соопштија властите.
И во соседен Непал, 21 лице загинало во инциденти поврзани со невремето во периодот од четврток до недела, соопшти агенцијата за управување со катастрофи. Пет лица и натаму се водат како исчезнати, а уште пет се повредени. Поплавите и одроните оштетиле 194 куќи. Непал сè уште се опоравува од разорните поплави во август, во кои загинаа повеќе од 1.400 лица, а речиси 6.000 се водат како исчезнати.