Не се согласувам дека причина за пожарот е продолжен кабел – Очевидецот на трагедијата во Тетово вели дека пожарот избувнал од дефибрилатор

ПОСЛЕДНИ ВЕСТИ

Мумин Исмаили е сведок на трагедијата во модуларната болница во Тетово. Тој не се согласува со вештачењето дека пожарот бил предизвикан од продолжен кабел. Вели дека избувнал од дефибрилаторот  кој бил вклучен во струја во соба број 3. Во моментот на несреќата тој бил со својата мајка, која настрадала  во катастрофалниот пожар.

„Во собата во која избувна пожарот беше мојата мајка и една 21-годишна Македонка, Марија. Таа беше со ментална попреченост и таа ноќ состојбата на Марија се влоши. Потоа, лекарите донесоа дефибрилатор за срце за да ја реанимираат, и кога го поставија апаратот на нејзиното тело, тогаш почна пожарот. Иако излегоа германски експерти и рекоа дека причина за пожарот е продолжен кабел, тоа не е вистина. Јас бев во собата, дефибрилаторот на беше приклучен на продолжен кабел, иако во собата имаше два, а не еден продолжен. Дефибрилаторот беше поставен…. на пример единица беше Марија, вториот кревет беше празен, на третиот беше сместена мајка ми. Дефибрилаторот беше кај креветот број два, директно во штекер, немаше продолжен кабел. Кабли имаше во собата како што открија вештаците, но дефибрилаторот не беше приклучен на продолжен кабел. Пламенот почна кога пукна дефибрилаторот. Пожарот почна од тука“, вели очевидецот Мумин Исмаили.

Исмаили раскажува како постапил во моментот кога во соба број 3 избувнал пожар и како се трудел да ја спаси мајка си за која се грижел 28 дена.

„Кога ја земав мајка ми од креветот за да излезе надвор, бидејќи вратата од соба 3 ми беше на 2 метри од вратата за излез надвор, првиот лекар ми рече да ја внесам во соба бр.2… мајка ми не изгоре во 3-ка, туку во соба 2. Кога влегов во 2-ката, имаше еден слободен кревет, имаше 5 пациенти и ја легнав мајка ми на слободниот кревет, но кај слободниот кревет немаше апарат за кислород, бидејќи обично пациентите ги земаат, и за мајка ми немаше. Му реков на брат ми да донесе еден апарат. Во тој момент, ако видовте, снема струја, стана темно и избувна пожар. Му благодарам на Бога што сум жив, ама знаете ли како останав жив? Со молитвите на мајка ми! Секое парче леб и го ставав во уста, а таа ми велеше – душо моја, се грижиш за мене, Господ да те благослови! Јас во собите видов луѓе како горат, а јас како што гледате жив и здрав сум. Имав повреди, но добар сум“, додава Исмаили.

Поради дефицит на медицински персонал, Исмаили објаснува зошто лекарите побарале од него и другите членови на семејствата да останат во болницата покрај нивните блиски заразени од Ковид-19.

„Лекарот побара едно лице да остане со пациентот бидејќи немаше услуга. Тие епрувети за кислород беа со вода и на минимум четири-пет минути требаше да се дополнуваат бидејќи водата се троши. Требаше да ставаме вода за да работи апаратот за кислород. Затоа беше неопходно членови на семејствата да бидат таму. Не бев единствениот, стекнав многу пријатели за тие 28 дена“, рече очевидецот Мумин Имсаили.

За трагедијата во тетовската модуларна болница, каде животот го загубија 12 пациенти и 2 членови на нивни семејства, Обвинителството до Основниот суд веќе поднесе обвинение против три физички и едно правно лице. Првите двајца се товарат по Член 292 од Кривичниот законик за сторено дело – нарушување на општата безбедност, а третообвинетиот за кривично дело – непостапување според здравствените прописи за време на епидемија.

Информациите на ТВ21 велат дека судијата за овој предмет се очекува да биде назначен на 16 август, по завршувањето на летните одмори, а потоа да се одржи и првото судско рочиште.