Честото консумирање ултрапреработена храна, како инстант тестенини, газирани и засладени пијалаци, засладени житарки за појадок и готови оброци, може да биде поврзано со поголем ризик од оштетување на мозокот и проблеми со меморијата уште во средната возраст, објави „Сиетл тајмс“.
Во студија спроведена во Канада, во која биле анализирани околу 9.000 лица на возраст од 35 до 69 години, истражувачите од Универзитетот „Мекмастер“ и Институтот за истражување на здравјето на населението откриле дека лицата кои консумирале најмногу ултрапреработена храна имале 40 отсто поголема веројатност да покажат знаци на мозочно оштетување познато како „тивок мозочен удар“.
Овој вид мозочен удар може да помине без видливи симптоми, но да остави трајни оштетувања на мозокот и да биде поврзан со поголем ризик од идни мозочни удари и проблеми со меморијата.
„Искрено, резултатите ме изненадија“, изјавил Расел де Соуза, вонреден професор на Универзитетот „Мекмастер“ и истражувач во оваа област.
Според истражувачите, ултрапреработената храна во просек сочинувала околу 25 отсто од исхраната на учесниците, додека кај некои лица нејзиниот удел достигнувал и до 40 отсто.
Истражувачката Соња Ананд истакнала дека поврзаноста меѓу исхраната и здравјето на мозокот може да се забележи уште пред луѓето да почувствуваат видливи проблеми со меморијата или размислувањето. „Нашите наоди сугерираат дека влијанието на исхраната врз здравјето на мозокот може да се открие пред да се појават видливи проблеми со меморијата или размислувањето“, изјавила таа.
Сепак, истражувачите нагласуваат дека се потребни дополнителни истражувања за подобро да се разбере оваа поврзаност. Студијата укажува на врска меѓу високата консумација на ултрапреработена храна и оштетувањето на мозокот, но не докажува дека овие производи се директна причина за оштетувањето.