Во Кичево, во близина на селото Србјани, под Централа, се гради утоварно-истоварна станица за отпад во Кичево.
Пред неколку недели, жителите на селата од Србјани до Пласница реагираа на ТВ21, спротивставувајќи се на оваа акција на Општината, но нивните гласови не беа слушнати.
Премиерот Христијан Мицкоски потсети дека се во преговори со сопственик на приватно земјиште за изградба на станицата, а во замена да му се даде државно земјиште.
„Регионалната депонија во Новаци, повторно ја градиме од нула и тој проект е во фаза на развој. Пронајдена е локација за утоварно-истоварска станица тука во Кичево и се работи со сопственикот на таа локација во замена за државно земјиште и кога тоа ќе биде завршено, ќе имаме утоварно-истоварна станица“, нагласи премиерот Христијан Мицкоски.
Ова продолжува да го зголемува револтот кај жителите, кои инсистираат дека нема да застанат, ќе се борат до крај, но градоначалникот на Кичево, Александар Јовановски, се обидува да ги смири уверувајќи ги дека не станува збор за депонија, туку за утоварно-истоварна станица за отпад.
„Во Кичево е планирана утоварно-истоварна станица, а не депонија, тоа мора да го разјасниме за да знаат нашите граѓани. Таа утоварно-истоварна станица ќе биде по сите светски стандарди, оградена, асфалтирана, нема да има канализација, нема да има загадување и што е најважно нема да има отпад, отпадот што ќе се собира секојдневно ќе се товари и испраќа во Новаци во Битола“, изјави Александар Јовановски – градоначалник на општина Кичево.
Според сите веројатности, депонијата во Новаци, Битола, ќе биде готова во 2029 година, па затоа жителите се загрижени колку отпад ќе се собере за 3 години на локацијата каде што се гради станицата, која е многу блиску до населените места, особено до селото Србјани, додека токму на тоа место се обработуваат ниви и викендички.