Некои од највпечатливите зајдисонца во светот не се случуваат над познатите метрополи, туку во пустини, на карпести предели и покрај тиркизни мориња. Ново истражување издвојува 20 дестинации со најдобри услови за набљудување и фотографирање на таканаречениот „златен час“, а првото место го освои пустината Вади Рум во Јордан.
Истражувањето го спровела туристичката компанија „Куони“ во соработка со метеорологот Џим Дејл од „Бритиш ведер сервисис“. Анализирани биле 165 дестинации низ светот, при што биле земени предвид облачноста, врнежите, брзината на ветерот, светлосното загадување и просечното времетраење на зајдисонцето.
Од сите анализирани локации, 20 се најдоа на конечната листа, на која доминираат пустинските предели, но и грчките острови.
Вади Рум – најдобрата дестинација за „златниот час“
Пустината Вади Рум во Јордан го освои првото место благодарение на поволните временски услови, малата облачност и впечатливите пејзажи. Позната и како „Долината на Месечината“, оваа област се одликува со црвен песок и масивни карпести формации кои при зајдисонце добиваат интензивни портокалови и црвени нијанси.
Второто место ѝ припадна на пустината Сосусвлеј во Намибија, позната по огромните песочни дини и малото светлосно загадување. Просечното времетраење на зајдисонцето таму изнесува 27,9 минути.
На третото место е Дамараленд, исто така во Намибија, додека четвртата позиција ја зазеде пустината Атакама во Чиле. Петтото место ѝ припадна на пустината Вахиба во Оман.
Намибија има вкупно три дестинации меѓу првите шест. Покрај Сосусвлеј и Дамараленд, на шестото место се најде Националниот парк Етоша, кој нуди можност за фотографирање диви животни во топлата вечерна светлина.
Грција со четири дестинации на листата
Грција е меѓу најуспешните европски земји во рангирањето, со четири дестинации меѓу 20-те најдобри места за набљудување на „златниот час“.
Највисоко рангирана е Акрополата во Линдос, на островот Родос, која го освои десеттото место. Античката знаменитост се наоѓа на карпест рид околу 116 метри над морето, од каде што се отвора широк поглед кон крајбрежјето и околните предели.
На 17-тото место е градот Родос, додека ’ртот Сунион, во близина на Атина, се најде на 19-тата позиција. Оваа локација е позната по античкиот храм на Посејдон, кој при зајдисонце добива посебен изглед.
Листата ја затвора плажата Навагио на островот Закинтос, препознатлива по тиркизното море, високите карпи и остатоците од насуканиот брод.
Топ 20 дестинации за најубав „златен час“
- Вади Рум – Јордан
- Сосусвлеј – Намибија
- Дамараленд – Намибија
- Пустината Атакама – Чиле
- Пустината Вахиба – Оман
- Национален парк Етоша – Намибија
- Делтата Окаванго – Боцвана
- Долината Сан Хоакин – САД
- Национален парк Улуру-Ката Тјута – Австралија
- Акрополата во Линдос, Родос – Грција
- Викторини Водопади – Зимбабве
- Рас ал Хајма – Обединети Арапски Емирати
- Реката Чобе – Боцвана
- Планините Флиндерс – Австралија
- Седона, Аризона – САД
- Пафос – Кипар
- Градот Родос – Грција
- Ливингстон – Замбија
- ’Ртот Сунион, Атина – Грција
- Плажата Навагио, Закинтос – Грција
Што го прави „златниот час“ толку посебен?
„Златен час“ е периодот непосредно по изгрејсонце или пред зајдисонце, кога сонцето е ниско над хоризонтот, а светлината добива топли жолти, портокалови и црвени нијанси.
Во тие моменти сончевите зраци поминуваат низ подебел слој од атмосферата, поради што светлината изгледа помека, а сенките се подолги и помалку остри. Пејзажите добиваат поголема длабочина, а боите стануваат поизразени – услови што ги прават овие моменти особено привлечни за фотографите.
И покрај називот, „златниот час“ не трае секогаш 60 минути. Времетраењето зависи од географската ширина, годишното време и положбата на сонцето.
Истражувањето покажува дека најдобрите услови за фотографирање не зависат само од убавината на одредено место. Чистото небо, малата облачност и ниското светлосно загадување можат да бидат поважни од туристичката популарност.
Токму затоа пустините во Јордан, Намибија и Чиле се најдоа пред многу познати градови и светски знаменитости, нудејќи им на патниците можност да го доживеат зајдисонцето во неговото највпечатливо издание.